xoves, 11 de maio de 2017

CELEBRACIÓN DAS LETRAS GALEGAS 2017

Este é o cartel da actividade que temos este ano para a celebración do día das letras galegas, e dende o Equipo de Dinamización da Lingua Galega esperamos que sexa do interese de moitos dos alumnos e profesores do centro, e tamén invitamos a calquera outra persoa que queira asistir.





Aproveitando a celebración do Día das Letras Galegas e tendo en conta o proxecto Colleitadores, que está a levar a cabo o  do noso centro este ano. Imos a facer un dous por un, e traeremos a uns relatores que están fondamente relacionados coas letras e a cultura galegas, pero que ademais saben de plantas silvestres comestible, e sobre todo apaixónalles o tema.
Deste xeito o programa do día 18 no que tamén celebraremos as "II Xornadas adicadas á industria conserveira: Do Campo á Mesa", é o que segue.

E xa para ir despertando a vosa curiosidade no tocante ás xornadas, recollemos aquí os detalles dos logros dos nosos poñentes.

Jorge Guitián castromil



Como el mesmo nos conta no seu blog, é un compostelán nado en Vigo, que vive entre Galicia e Sevilla.
Estudou historia da arte e foi técnico superior no Consello da Cultura Galega, técnico historiador para a fundación Santa María a Real, director de investigación histórica dentro do Plan Director do Conxunto Monumental das illas de San Simón e San Antón (Pontevedra), e investigador da arte prehistórica galega en relación co cal escribiu un libro sobre a arte rupestre no Barbanza.

É un gran afeccionado á cociña e a gastronomía, e por iso se desviou un pouco do camiño que levaba a súa traxectoria profesional e comezou a escribir un blog de crítica culinaria Diario del Gourmet de Provincias y del Perro Gastrónomoque o levou a acadar o éxito neste campo. Chegando a gañar, en 2008, o Premio Nacional de Xornalismo Gastronómico Álvaro Cunqueiro, e en 2009 o Navarra Gourmet ao mellor blog gastronómico.

É un dos creadores do proxecto Gastrópodos, que se adica á xestión e deseño de estratexias, para grandes e pequenas marcas do sector agroalimentario e gastronómico.

Colaborou en televisión, radio e medios impresos, e imparte relatorios sobre alimentación e cociña. E Dende a primavera de 2015 participa, como crítico gastronómico e xurado, en "Gastrópodos: Cociña en Ruta, un programa da TVG".
Conta no seu blog que lle gustaría escribir outro blog relacionado coas plantas silvestres comestibles, pero que non ten tempo, ¡e como vai ter!

 

 MANUEL REINALDO LOUREIRO PÉREZ

Aínda que don Manuel Loureiro é xa da casa, non está de máis recordar tamén, por se alguén non o coñecera, que non creo, os seus logros profesionais. 

Aquí preto, en Castiñeiras, naceu Manuel Reinaldo Loureiro Pérez. Fillo de pai ferroviario e nai mestra.  Licenciouse en Químicas pola Universidade de Santiago. Ao rematar a súa formación foi contratado pola empresa Nestlé en Suíza, que non é calquera cousa. Despois traballa para Pinilla (Santander). E incluso foi profesor non numerario no instituto "El Puente", de Ourense. Despois diso cambiou radicalmente de sector e comezou a traballar nos Estaleiros de Reinosa como xefe de laboratorio de investigación, cando aínda ninguén falaba da I+D. Logo pasou aos Altos Fornos de Vizcaia onde ocupou distintos postos e chegou a ser representante español na normalización siderúrxica europea dentro da organización da Comisión Europea e experto español en temas de investigación siderúrxica.

En 1.989 volta a Ribeira, e constitúe a empresa "CONSERVAS E AFUMADOS LOU S.L.", situada na parroquia de Olveira, adicada fundamentalmente á fabricación de anchoas en diversas especialidades, bocarte en vinagre e salmón afumado. En 1.993 compra o edificio da antiga fábrica do seu bisavó, "Fillo de Tomás Martínez" e traslada alí a empresa. Iníciase entón na fabricación de algas mariñas en conserva do cal xa nos estivo a falar o ano pasado, precisamente con motivo das "I Xornadas adicadas á Industria Conserveira: Algas do Mar á Mesa". Foron pioneiros en escoller as axeitadas e en iniciar campañas de divulgación deste produto dada a inexistencia dunha cultura gastronómica das algas, hoxe xa afianzada. Na mesma época inícianse tamén na fabricación de Caviar de ourizo, afumados en conserva e outros. Outra liña de produción foi a que o trae esta vez ata o noso centro, a fabricación de produtos vexetais tales como as Ortigas ao natural, produto de gran innovación.




Martín Álvarez González


Martín Álvarez González naceu en Ourense, e actualmente é profesor de Cociña do Instituto de Ensino Secundario de Vilamarín (Ourense). Preside a Asociación Cultural As Ortigas, que loita por prestixiar as propiedades da Urtica dioica, e é autor de numerosos traballos gastronómicos, entre eles, o volume "Estrugas", editado pola Deputación Provincial de Ourense no 2006. Deputación á que temos que agradecer o agasallo dun exemplar dese libro para a nosa biblioteca. 
Comezou a súa carreira profesional no Instituto no que hoxe exerce como docente, cursando estudos de Hostalería. Máis tarde diplomouse en Empresas e Actividades Turísticas pola Escola Universitaria CEBEM de Vigo e perfeccionaría o seu saber xunto ao chef Moisand no restaurante do hotel Westminster de París. 
É un apaixonado e bo coñecedor dos usos e aproveitamento das plantas silvestres comestibles. Aínda que os seus traballos se centraron sobre todo na ortiga, coa cal é quen de elaborar innumerables preparacións, dende licores e cervexa, ata galletas, pasando por elaboracións non culinarias como cremas para a pel e o cabelo. 
En relación a este tema escribiu tamén "45 recetas con ortigas", que temos tamén na nosa biblioteca como nova adquisición. Libro co cal chegou a gañar dous premios Gourmand en 2006: como mellor monográfico gastronómico editado en español e Medalla de Honra do xurado internacional.
No seu libro "Guía secreta da gastronomía galega: Ourense" percorre "coma un Cunqueiro do século XXI" as feiras, as festas, as romarías e os mercados desa provincia, e recolle as súas tradicións gastronómicas. Escribiu tamén "O barquilleiro d'olvido" (2009), e colabora dende 2007 da revista "Auria".

Ningún comentario:

Publicar un comentario